Wednesday, January 17, 2024

පිබිදෙන වසන්තය

දළු දාගෙන එන ගස් බල බල
පිබිදෙන විසිතුරු මල් දැක දැක
ලා අව් රැලි සිත් සේ විඳ විඳ
හිමිදිරියේ ඇවිදිමු පිය තිය තිය

ඔක්තෝබර් 11, 2023
මෙත්මා


Monday, January 15, 2024

වැස්සට කවි තුනක්

බිංදු බිංදු පොද වැටිලා මහ වැස්සක් එනවා
පාට පාට පුරවාගෙන දේදුන්නක් පායා
පාවි පාවි වළා ඇවිත් මුළු අහසම පිරිලා
පුංචි පුංචි මල් පිපිලා වැස්සේ හිනහෙන්නා










ඔක්තෝබර් 3 උදේ, 2023
මෙත්මා

සුලඟක් හමා යයි මා ගත දැවටීලා
සීතල නෑ දැනුනේ සිසිලයි මට දැනුනේ
දළු දාමින් මේපල් ගස් පිබිදෙන්නට යනවා
මල් පිපෙන්න දවසක් දා පොහොට්ටු ලොකු වෙනවා

ඔක්තෝබර් 4 උදේ

බිංදු බිංදු පොද වැස්සක් ඔන්න කඩා හැලෙනවා
ඩිංග ඩිංග වහල දිගේ වතුර ගලා ඇදනවා
හැඩට පිපුන කහ මල් ටික හෙමින් හෙමින් හැලෙනවා
රතු ගිරවුන් දෙදෙනෙක් විත් කීචි බීචි ගානවා













ඔක්තෝබර් 4 හවස
මෙත්මා

Sunday, January 14, 2024

කවි අහමුද?

අපි ඉතින් වැඩිය ඇඟ මහන්සි කරලා වැඩ කරන අය නොවන නිසා දෛනිකව ව්‍යායාම කරන එක හරීම වැදගත්. ව්‍යායාම කරන එක  ශාරීරික සුවතාවයට වැදගත් බව නම් ඉතින් පේන්නම තියෙනවනේ. ඒ විතරක් නෙවෙයි ඒක මානසික සුවතාවයටත් ඉවහල් වෙනවා. ඒ නිසා මම දින පතා අනිවාර්යයෙන්ම උදේට ඇවිදින්න යනවා. වාර්ෂික නිඩාඩු දාලා ගෙදර ඉන්නැද්දි නම් ඒක මග ඇරෙනවා ටිකක්. ජොගින් නෙවෙයි, දුවනවත් නෙවෙයි ටිකක් වේගෙන් ඇවිදිනවා. උදේට විනාඩි විස්සක් වගේ ඇවිදිනවා වගේම කිලෝමීටර දෙකකට ආසන්න දුරක් යනවා. හැමදාම යන්නේ එකම පාත් එකක.

මොකක් හරි හේතුවක් හින්දා මට හිතුනා කවි ලියන්න. ලියන්න නෙවෙයි ගොතන්න. කවි හදන එක මට අළුත් දෙයක් නෙවෙයි. මට මතකයි මං හය වසරේ වගේ ඉන්න කාලේ කවි ලියන්න සෑහෙන උත්සහයක් ගත්තා. හරියට ලියාගන්නත් බෑ, ඒත් ලීවා. කොහොම හරි දිගටම කවි ලීවා. සෑහන කාලයක් නොයෙක් විදියේ කවි ලීවා, නමුත් පහු ගිය වසර දෙක තුනක දී වගේ නම් ඒක මග ඇරුනා. කොහොම හරි ඉතින් මට කවි ගොතන්න හිතුනනේ, මම ලියන්න පටන් ගත්තා. පූසි ගැන කවි කීපයක් ලීවා. 

උදේ ඇවිදිනකොටත් කවියක් ගොතන්න හිතුනා. ඉතින් මම හිතුවා, වැඩිය මහන්සි වෙන් නැතිව සරලව කවියක් ගොතන්න ඕනි කියලා, මේ ඇවිදින ගමන්. කවියෙ පදයක් ගොතලා තව එකක් ගොතන කොට අර කලින් පදේ අමතක වෙනවා, ඒ හින්දා මේක ගොතන ගමන්ම පෝන් එකේ හඬ පටි ගත කරා නම් හරි නේ කියලා, කවිය එක පාරටම ගොතන ගමන්ම පටි ගත කරා. මොන්න බොලේ කවි ගොතන කොට ගොතන කොට අදහස් එනවා නේද එක දිගටම. ඉතින් මුලින් මුලින් පද හතරක එක කවියක් ගෙතුවත්, පස්සෙ පස්සේ කවි පන්තිත් හැදුවා. ඒවා මේ හිටිවන කවි, එවෙලේ හදපුවානේ. ඒ ඒ දවවල පරිසරයේ ස්වබාවය ලියවිලා තියෙනවා මේ කවි වල. ඉතිං ඒ කවි කියවන්න කැමතිනම් ඒවා ලියන්න පුළුවන් මට. තාල එහෙමත් දාලා හැදුවේ. ඉතිං අහන්න කැමති නම් හඬ පටත් අමුණන්න පුළුවන්. මොකද කට්ටිය හිතන්නේ ඒ ගැන.



පූස් සහ බඹරු

පූසිනියා කොහෙද ගියේ
බඹරුන් අල්ලන්න ගියේ
ඒ බඹරුන් ඇයි ආවේ
මල් පැණි බොන්නයි ආවේ

යන්න එපා අල්ලන්නට
ඉන්න දෙන්න බඹරුන් හට
බඹරුන් වැඩියෙන් ආවම
සරු වෙනවනේ පළදාවම










ඔක්තෝබර් 2, 2023
මෙත්මා 


Thursday, January 11, 2024

මිදෙන්න දොම්නසෙන් සැම

විඳින්න හමන සුළඟක සුව
අහන්න ගයන විහඟුන් ගේ හඩ
බලන්න පිපුණු මලක හැඩ
සිඹින්න විදිමින් ඒ මල් සුවඳ

හිඳින්න ගස් සෙවන යට
විඳින්න පළතුරු ගෙඩියක රස
සැනසෙන්න බලා ගිරවුන්ගේ හැඩ
හිනැහෙන්න දැක උන්නේ වැඩ

ඇවිදින්න මං මාවත් දිග
හිනැහෙන්න අයෙක් හමු වූ විට
බලන්න අවට සුන්දරත්වය
විඳින්න හැම මොහොතකම සුව

සැනසෙන්න බලා නුබ
හිතන්න වහී විද කියා අද
බලන්න හිරු බසින රඟ
තුටු වෙන්න දැක දම් වළා පෙළ

මෙත්මා 
ජනවාරි 11, 2024

Sunday, May 15, 2022

අපිත් හරියට වෙසක් කූඩු වගේ.


ලස්සනට වෙසක් කූඩුවක් හදන්න ගොඩක් මහන්සි වෙන්න ඕන, ඒ වගේම අපේ ජීවිතය ලස්සනට ගොඩනඟා ගන්න ගොඩක් මහන්සි වෙන්න ඕනී. 

වෙසක් කූඩු විවිධාකාරයි, අපේ ජීවිතත් විවිධාකාරයි. 

කූඩු හදන්න භාවිතා කරන ටිෂු කොළවල තුනී ස්භාවය නිසා ඒවා කපද්දීත් හසුරුවද්දීත් අපිට ඉතාම ප්‍රවේශම්කාරී වෙන්න වෙනවා. කැටයමක් කපද්දී ටිෂූ කොළේ වැරදිලා කැපිල යන පුළුවන්, කොහේ හරි පැටලිලා ඒවා ඉතා ඉක්මනින් ඉරෙන්න පුළුවන්. අපේ ජීවිතත් ඒ වගේමයි, ක්ෂණයකින් බොහොම පුංචි දේකින් අපේ ජීවිතේට කරදරයක් හෝ ජීවිතේ නැතිවෙන්න හෝ පුළුවන්. ඉතා කුඩා උණ්ඩයකින් තියුණු පිහියකින් පොලු පහරකින් වාහනේක ගැටීම වැනි සුළු දේකින් වුණත් ජීවිතය හානි වෙන්න පුළුවන්. 

කූඩුවක් ලස්සන වෙන්නෙ එයාගෙ කැටයම් දාලා කදිමට අලවලා තියෙන කොළ හින්දා. අපව ලසන්නට ලෝකයට පෙනෙන්නේ අපේ ශරීරය වහගෙන තිබෙන සම නිසා.  

අපි කූඩුවක කොළ අලවන කොට කිසිම සිදුරක් නැතුව තමයි කොළ අලවන්නෙ. එහි සිදුරක් තිබුනත් ඒ මගින් කුඩු ඇතුලට සුළං ඇවිත් ඉටි පහන නිවෙන්න පුළුවන්. ඒ වගේම අපේ ජීවිතයටත් බාහිරින් යම් යම් විසබීජ හෝ ලෙඩ රෝග හෝ ඇතුල් වෙලා ශරීරයට හානියක් වෙන්න පුළුවන්. 

වෙසක් කූඩුවක් අලවලා ඉවර වෙච්ච ගමන් හරි ලස්සනයි. නමුත් ටික කාලයක් යනකොට ඒක ටික ටික ජරාජීර්ණ වෙනවා. කොළවල පාට අඩුවෙනවා, වැස්සට තෙමිලා කොළ ඉරෙනවා, තද සුළඟ නිසා කොළ ඉරිලා යනවා, කූඩුවේ කොටස් කැඩිලා යනවා, වැස්සට තෙමිලා රැලි එකිනෙක රැලි එකිනෙකට ඇලවෙනවා. නොයෙකුත් අකරතැබ්බ වලට මුහුණ දෙමින් එයා කාලයත් එක්ක වෙනස් වෙනවා. අපේ ජීවිතත් ඒ වගේ තරුණ කාලේ හරිම ලස්සනයි සිත්ගන්නා සුළුයි ශක්තිමත්, නමුත් වයස යන්න යන්න ලෙඩ එනවා, වැහැරෙනවා, කොන්ඩ සුදු වෙනවා, නොහැකි වෙනවා, ආකර්ෂණය නැති වෙලා යනවා.

ඉපදීමෙන් පටන් අරගෙන වසර ගණනාවක් ජීවත් වෙලා මරණයෙන් අවසන් වන ජීවිතයක සංක්ෂිප්ත අනුවාදයක් වගේ වෙසක් කූඩුවක්.  


මෙත්මා
2022 මැයි 15

Friday, April 22, 2022

හාට් ඇටෑක්, පෙණහලු සවුතු වීම, සහ රට හරහට


මීට වසර ගාණනාවකට කලින් මම යනවා එක්තරා දොස්තර වරයෙක් මුණ ගැසෙන්න. මම ආ කාරණාව පැත්තකට දාලා, එයා මට ලෙක්චර් එකක් දෙනවා සමාජයේ බහුල දක්නට තියෙන මාරාන්තික ලෙඩ, ඒවා ඇති වීමට හේතු, රෝග ලක්ෂන මතුවන අවස්ථව,  ඒවා වලක්වා ගත හැකි ක්‍රම ආදී දේවල් සම්බන්ධයෙන්.


"ආනේ බලන්නකෝ, මේ හොඳට හිටිය කෙනා නේ, එක පාරටම හාට් ඇටෑක් එකක් ඇවිත්නේ නැති වෙලා තියෙන්නේ"

" පෙණහලු දෙක ගන්නම දෙයක් නැහැලු, හොඳටම සවුත්තු වෙලා කියන්නේ"

මෙවන් වදන් අපිට ටිකක් හුරුපුරුදුයි නේද? හාට් ඇටෑක් ඒමත් පෙණහලු නරක් වීමත් එක පාරට වෙන දෙයක් බව සමාජය හිතන්න පුරුදු වෙලා ඉන්නේ, මේ දේවල් මතුවට එන බවට කිසිම ලක්ෂණයක් කලින් නොපෙන්වන නිසා බව මේ දොස්තර මට දැන් දිගින් දිගටම පැහැදිලි කරනවා.  

උදාහරණයක් විදියට කියනවා නම්, හර්දයේ රුදිර නාල එක පාරටම අවහිර වෙන්නේ නැහැ, කාලයක් තිස්සේ අපි ගන්න ආහාර පාන වල බලපෑම නිසා, ටිකෙන් ටික බොහොම හිමින් තමයි අවහිර වේගෙන එන්නේ. ඒත් රුදිර නාලය සම්පූර්ණයෙන්ම වාගේ අවහිර උනාම තමයි හාට් ඇටෑක් එක එන්නේ. එතෙක් කල් මෙවන් දෙයක් අපේ ශරීරය තුල සිදුවෙමින් පවතින බවට අපිට කිසිම රෝග ලක්ෂණයක් පෙනෙන්නේ නැහැ.

පෙණ්හල්ලත් එහෙම්ම මයි. එයින් 95% ක් විතර අකර්මණ්‍ය වෙනකල් අපිට කිසිම රෝග ලක්ෂණයක් පෙන්නන්නේ නැහැ. ඉතින් අපි අවුලක් නෑනි කියලා හිතලා තවත් දුම් බිබී කැහැ කැහැ විනෝද වෙනවා. නමුත් ලෙඩේ අඳුර ගන්නකොට වෙන්න ඕනි ඔක්කොම වෙලා ඉවරයි. එය සුවපත් කරන්න බැරි තැනට පත් වෙලා. එතකොට අපි පරක්කු වැඩියි.

"අනේ අපේ රටට මොකද්ද මේ එක පාරටම උනේ, හොඳට තිබ්බ රටනේ?"

"අපේ අම්ම මුත්ත කාලෙවත් මෙහෙම පෝලිම් තිබ්බද?"

"කොයි ආණ්ඩුවකදි වත් මේ තරම් බඩු මිල වැඩි වෙලා නෑ"

මට පේන්නේ රටක් වුනත් හැසිරෙන්නේ හරියට පෙණහල්ලක් වගේ රුධිර නාල වගේ. අපි කවුරුත් හිතුවේ අපේ රට සංවර්ධනය වෙමින් පවතින, කිසීම ප්‍රශ්නයක් නැති රටක් කියලා. ඔන්න දැන් එයා අපිට පෙන්නවා රට කඩාගෙන වැටෙන ලක්ෂන. පේන හැටියට ජන ජීවිතේ එන්න එන්නම අඩාල වෙන්නයි යන්නේ. මේ ප්‍රශ්නයට විසදුමක් පේනතෙක් මානෙක නෑ.

මතුපිටින් බලලා හිතන්න එපා, අපේ රට එක පාරටම කඩා වටුනා කියලා. ආර්ථිකය කඩා වැටුනේ ටිකින් ටික. රුපියලේ අගය අඩු වුනේ ටිකින් ටික. කර්මාන්තය ශාලා එකින් එක වැහීගෙන යනකොට, ආනයන වැඩි වෙනවා. කාලයක් තිස්සේ ණය අර ගෙන කාලා බීලා ජොලි කරපුවගේ රඟ දැන් කාට කාටත් දැනෙන්න අරන්. 

රටක් සංවර්ධනය කරන එක පහසු වැඩක් නෙවෙයි. ඒකට උනන්දුව, කැපවීම්, දේශීය නිෂ්පාදන, කර්මාන්ත සහ ව්‍යාපාර නගා සිටුවීම, නාස්තිය අවම කිරීම, උපාය ශීලී බව වගේ ගොඩක් කරුණු අත්‍යාවශ‍යයි. බොහොම සතුටින් හිතේ සැනසීමේ ජීවත්වන මිනිසුන් ඉන්න රටක් වේනම්, ඒ රටේ මිනිස්සු එතරම් හොඳින් ඉන්නේ කාලයක් තිස්සේ බොහො මිනිසුන් කල කැපවීම් මහන්සි වීම් වල ප්‍රතිඵලයක් වශයෙන්. රටක් වැටෙන එකත් එහෙම්මම්යි.

අපේ රටේ දක්ෂයෝ ගොඩක් ඉන්නවා. ඒත් ඒ අයගේ දක්ෂතා වලට එලියට එන්න ඉඩ දෙන්නේ නෑ, ඔවුන්ට අත දෙනවා වෙනුවට බිමට ඇදලා දනවා. නාස්තිය උපරිමයි, දේශීය දේට අගයක් නෑ. ඉතිං අපේ අය එයාලට අගයක් දෙන පිට රටකට එයාගේ දැනුම විකුණනවා. 

මෙත්මා
2022 අප්‍රේල් 22









Saturday, November 20, 2021

සුභ පැතුම් කවියෙන්

අපේ අම්මා මේ ලඟකදී ඉඳන් පටන් අරන් තියෙනවා උපන්දිනේට සුබ පතන්න කවියෙන්. මම තමයි එයාගෙ අදහස දැම්මේ. එයාගෙ මිණිබිරීගේ උපන්දිනේට  "අනේ ඉතින් මට දෙන්න දෙයක් නෑනේ" කියද්දි මම කිව්වා, 

"ඉතින් ඔයා ඉතින් ලස්සනට කවි ලියනවා නේ, කවියක් ලියලා දෙන්නකෝ" කියලා.

ඒ ලියපු කවිය අපි පස්සේ බලන්න තියාගෙන, අද බලමු එයා මට දුන්න කවිය මොනවගේද කියලා. 


තිළිණයක්  දෙන්න හිතුනත් උපන් දි⁣⁣          න දෙන්නට දෙයක් නැත ඔබ හට ඉතින් වෙන පැතුමන් සමගින්ම ඔවදන් හරි වටි ම      න 
කවි මල් මිට මගේ සතුටින් පිළිගන්          න 

ජීවන ගමන කරගෙන රෝදයක් ව       ගේ 
සැප දුක දෙකම ඇත අප යන අතර ම ගේ 
පියකරු  සුවඳ ඇති ලස්සන මලක් ව  ගේ
ජීවත් වෙන්න සැමදා එය තමයි අ         ගේ

ඉහළ බලාගෙන වැඩුනත් දිනෙන් දි      න 
පලබර වෙන විට දී ඇත බිම බලා ගෙ න
නිරහංකාර බව ලෝකෙට කියා දෙ       න 
පාඩම එයයි ලොව ගරු බුහුමන් ලබ   න 

පලබර ගසටමයි ගල් මුල් වදින්         නේ
ගස නම් අනේ නැත කලබල කරන්   නේ
අතු ඉති දමා යළි යළි පල දරන්           නේ 
යහපත තමයි ලෝකයටම  බෙදන්    නේ 

අපගේ සියලු කුණු කන්දල් දරාගෙ      න
රස මුසු බොජුන් ඒ වෙනුවට ලබා දෙ  න
සාමය සතුට නිතරම තුරුලට රැගෙ    න
මිහිකත වගේ ඉවසීමෙන් කල් ගෙව   න

උදේට පිපෙන මල් ලස්සන හැඩයි ව   ගේ
හවසට පිපෙන මල් සුවඳයි සුදුයි ව     ගේ
මේකෙන් අහගන්න දුව රත්තරන් ම   ගේ 
ජීවත් වෙන්න සුවඳැති හැඩ මලක් ව  ගේ 

සිතන පතන දේ එලෙසම ඉටු වෙන්න      යි
තෙරුවන් සරණ නිති සැමදා ලැබ ගන්න  යි
තිස්තුන් කෝටියක් දෙවියෝ රැක ගන්න  යි 
මගේ  පැතුම ඒ ලෙසටම ඉටුවෙන්න        යි 

මම නොදුටුව නව ලෝකයෙ කිරුලු පලන් රැජින වෙලා
ඔබ අද මට වෙන්නට හැකි ඉහළම තිළිණයක් වෙලා 
මගෙන් වුනා නම් වරදක් අසරණ මට සමාවෙලා
ඉපදේවා සසර වසන තුරුම මගේ දුවම වෙලා

කරුණාවතී


ඉතින් මට ගොඩක්ම වටින්නේ එයා මට දුන්න ඔවදන් ටික. තනතුරින් ඉහළට යන්න යන්න නිරහංකාර වෙන්න කියන එකත්, නින්දා අපහාස වලට සැලෙන්න එපා කියන එකත්, මිහිකත වගේ ඉවසන්නත් එයා මට කියනවා. ඉතින් ඒ දේවල් හැමදාම මගේ හිතේ තියෙයි. 

මම ඔයාලවත් ධෛර්යමත් කරනවා ඔයාගේ ආදරණීය වෙනුවෙන් පැතුම් යවන විට කවියෙන් සුබ පතන්න කියලා.




Sunday, October 24, 2021

ගෙවල් හෙවිල්ල | ටීකා සී පද

ඉන්නා ගේ ...

හීටර දෙකතුනකුත්, විදුලි ලිප් කීපයකුත් දාලා ඒත් බැරිතැන මේසුත් ජේසිත් දාලා රෙද්දකුත් පොරවගෙන හා පැටව් වාගේ හීතලේ ගුලිවෙලා, ගෙදට්ටම වෙලා බතක් මාළුවක් උයාගෙන, පීස් ටිකක් වවාගෙන, වැඩක් පලකුත් කරගෙන, ඇපල් මලක් පිපෙනකල් බලා ඉන්න කොට...

ඉන්නා ගෙදර දෙන්නැයි ඉල්ලුවා ගෙය අරගත් අළුත් කෙනා...

රටත් වහලා, ගමත් වහලා, කඩ අනං මනං ඔක්කොමත් වහලා, ගෙයින් පිටට අඩියක් වත් තියන්න බැරිව, දන්න, නොදන්න, දැක්ක, නොදැක්ක, හැමෝම හැකි නොහැකි හැම වැඩක්ම ගෙයි ඇතුලේ ඉදං, රෙදි සෝදන ගමං, රෙදි වේලන ගමං, ළමයි නලවන ගමං, රංඩු බේරන ගමං, බත් උයන ගමං මතක් උනොත් වැඩත් කරන කාලේක ...

යන්නත් බෑ බලන්නත් නෑ, නමුත් ගෙයක් අපි හෙව්වා ...

පරිගණකයෙන්, දුරකතනයෙන් අතට අහුවෙන හැම මගුලකින්ම උදේ හිට දවල් වෙනකල්, හවස වැඩ ඉවරවෙලා රෑ වෙනක ගෙවල් හොයනවා, කාමර කීයද, නාන කාමර කීයද, වාහන පාකින් කීයද, ගාන කීයද, උඩට පහළට යනවා, තරු දානවා, ඒ පැත්ත දුරයි එහෙන් එපා කියනවා, මලක් පැළයක් හිටව ගන්න හැකිද බලනවා, අන්තිමේදී රෑ හීනෙනුත් ගෙවල් පේන්න විට ...

එකම එක ගෙයක් බලන්න අපිට යන්නට ලැබුනා ...

රැකියාව, පඩිය, උපත, විවාහය, කලින් හිටි තැන් එකී නොකී මෙකී හැම ලියවිල්ලක්ම පෙට්ටගං අස්සෙං හොයාගෙන පත්තරක් වගේ දිය කොලේකුත් පුරවලා අරයට මෙයාට දෙන්න එපා මේ ගේ අපිටම දෙන්න කියලා දාහක් දේ කියලත් ගෙයක් හොයාගන්න බැරිව ලට්ට ලොට්ට ටිකත් අරගෙන පාරට බහින්න වේද හිත හිතා ඉන්නා කලක ...

රූප වලින් විතරක් දුටු ගේකට අපි හෙට යනවා ...

ඈත ගම්දනව්වකින්, කවදාවත් ඇහැටවත් නොදැක්ක, කාගෙන්වත් අහල දැන කියාගන්න බැරි වුන, පින්තූර කෑල්ලකින් විතරක් දුටු අයෙන් ආවාහ විවාහ කරගන්න, ගෙවල් දොරවලුත් අස් කරලා, උත්සව ශාලාවකුත් වෙන් කරගෙන, නෑදෑයිටත් එන්නත් කියලා, තෑගි බෝගත්, රෙදි පෙරෙදිත්, රත්තරං බඩුත් අරගෙන යන්නා වාගේ...

අපි යනවා... 


මෙත්මා
ඔක්තෝබර් 24, 2021








Sunday, September 19, 2021

දුර්වලතා දක්ෂතා බවට

 ඔව් අදත් කතාව පටන් ගන්නේ යොහානිගෙන්. පේනවනේ ඇයව කොච්චර හිතට කාවැදිලද කියලා. ඇයට තියෙන්නේ ඇයටම ආවේනික ගායනා විලාශයක්. මම මුල්ම වතාවට රසවිදි ඇගේ 'මට ආලෝකේ ගෙනදේවි' මෑශ් අප් කවර් එකෙන්ම ඒක මට පැහැදිලි උනා. මුල් ගායනයට වඩා විශාල වෙනස්කම් ඇගේ ගායනයේ ඇති බව මම සංගීත හදාරපු නැති කෙනෙක් වුනත්, මට අවබෝධ වුණා. එදා මට හිතුන දෙයක් තමයි මෙයා ඇගේම සිංදුවක් කරොත් එය බෙහෙවින් සාර්ථක වේවි, අන් අයගේ සින්දු කියන එකට වඩා ‍යන බව.

දින කීපයට කලින් මට ඉඟියක් ලැබුණා ඇගේ ගායන ශෛලියේ වෙනස්කම සම්බන්ධයෙන්. ඒ ඇය හා නුවන් කළ 'සයුරේ' යන මෑශ් අප් එක අහද්දි. මෙතැනදී ඇය සයුරේ, අඹ යාළුවෝ, උන්මාද වූ යන ගීත තුනෙන් කොටස් ගායනා කරනවා. ඒ ගීත තුනම මම බෙහෙවින්ම ප්‍රිය කරන ගීත. සමහර ගීත අපේ මතකයේ රැඳිලා තියෙන්නේ ඒ ගීතය මුලින්ම ගායනා කළ ගායිකාවගේ හෝ ගායකයාගේ හෝ කට හඬත් එක්ක. ඇගේ අඹ යාලුවෝ ගීතයේ කොටසට මම කැමැති වුණත්, අනිත් ගීත දෙකේ මුල් ගායන ශිල්පිනියන්ගේ ගායනය වඩාත් හොඳ බව මට හිතුනා. නමුත් නුවන්ගේ ගායනයට මම කැමති වුණා. ඔන්න එතකොට ප්‍රශ්නයක් මතුවෙනවා,  'ඇයි යොහානිගේ ගායනයන් මම ප්‍රිය කරන නමුත් මේ ගායනය මගේ හිතට ඇල්ලුවෙ නැත්තේ?'. නුවන්ගේ ගායනය හරිම සුමටයි. ඔහු ගායනා කරගෙන යද්දී වචන අතර එයාගේ හඬ වෙනස් වීම සුමටයි, අඛණ්ඩයි,  මට සිලිටුයි. නමුත්, යොහානිගේ ගායන අලංකාර ගනිද්දී හඬෙහි අසන්තත බවක්, රළු බවක්, වෙන් වූ බවක් තියෙනවා. ඇයගේ ගායනයේ එකපාරම හඬ උස් පහත් වන අවස්ථා එමට තියෙනවා. නමුත් සාමාන්‍යයෙන් ගායකයෙක් හෝ ගායිකාවක් හෝ එවන් ගායන ශෛලියක් අනුගමනය කරන්නේ නැහැ. උදාහරණයක් විදියට අපි භාෂාවක උච්චාරණ විලාසය පැත්තෙන් හිතුවොත්; සුමට ඇමරිකන් ඉංග්‍රීසි කතා විලාශයයි, ටිටක් රළු ඔස්ට්‍රේලියානු ඉංග්‍රීසි කතා විලාශයයි වගේ. ගණිතයෙන් හිතුවොත්; සාමාන්‍යයෙන් ගායක ගායිකාවන්ගේ ගීත ගායනයේදී හඬ උස් පහත් වීම හරියට නිකන් ගලාගෙන යන්නේ සයිනාකාර තරංගයක් වගේ, නමුත් යොහානිගේ ගායනයේදී හඬ උස් පහත් වන්නේ හරියට නිකං හෘද ස්පන්දනය ප්‍රස්තාර ගත කළා වගේ.

ඉතින් එයාගෙ මේ වෙනස නිසා සමහර විට එයා වෙන කෙනෙක්ගෙ ගීතයක් ගායනා කරද්දී, එය මුල් ගායනයට වඩා හොඳ හෝ නරක හෝ වෙන්න පුළුවන්, ඒ ගීතයේ ස්වභාවය අනුව. උදාහරණයක් විදිහට සතීශන්ගේ 'මැණිකේ මගේ හිතේ' ගීතය, ඔහු ඉතා සුමට විදියට ගායනා කරනවා. නමුත් එම ගීතයම යොහානි ගායනා කරන විදිය වෙනස්. ඇය ක්ෂණික හඬ උස්පාත් කිරීම් වලින් ගන්න තානාලංකාර නිසා ඒ ගීතයේ රසවින්දනය  සෑහෙන්න ඉහළ නැංවෙනවා. ඒ ගීතය මෙච්චර ප්‍රසිද්ධ වුණේ  ඒ හින්දයි. ඉතිං මම තීරණය කරා ඇයගේ ගායන ශෛලියට ගැලපෙන ගීත ගායනා කල විට ඉතා සාර්ථක මුළු ලෝකයක් ආදරේ කරන නිර්මාණ වන වග.

අපි අපේ දක්ෂතා/දුර්වලතා අඳුරගෙන ඉන්න එක හරි වැදගත්. මගේ ඇති ගති ලක්ෂණයක් සාමාන්‍යයෙන් දුර්වලතාවයක් ලෙස සැලකුණත් එයම මගේ දක්ෂතාවයක් කරගන්න එක මගේ වැඩක්. උදාහරණයක් විදියට මේ කතා ලියන එක හරි කම්මලි වැඩක්. ඒ නිසා මං පුරුදු වෙනවා එහි රසය පවත්වා ගන්න ගමන්ම සංක්ෂිප්තව ලියන්න. එතකොට මගේ කාලයත් ඉතුරුයි, බලන කෙනාගේ කාලයත් ඉතුරුයි. 


මෙත්මා

2020 සැප්තැම්බර් 19