කාලෙ හරි

චන්දෙ දෙද්දි රට ගන ටිකක් හිතලා චන්දෙ දෙන්න කාලෙ හරි 

නාස්තිය දූෂණය වන්චාවට තිත තියන්න කාලෙ හරි 

ප්‍රතිපත්තියක් තියෙන දැනුම තියෙන මිනිස්සුන්ට එකතු වෙන්න දැන් කාලෙ හරි 

නිල් කොළ රතු පරම්පරාවෙන් ආව පක්ෂය අත් හරින්න කාලෙ හරි

රටේ නිතියට යටත් පාලකයෙක් එන්න කාලෙ හරි

රටක් වශයෙන්  දැක්මක් අතිව ඉදිරි ගමනක් යන්න කාලෙ හරි

නොයෙකුත් ක්ෂේත්‍ර වල ඉදිරි ගමනට උපාය මාර්ග සලස්වන්න කාලෙ හරි 

වෙනසක් කරන්න වැටිච්ච රට ගොඩ ගන්න කාලෙ හරි 

ඉවර කරන්න නිකං දෙනකන් බලා හිටපු කාලෙ හරි

කව්රු හරි අවිල්ල මොනාව හරි කරාම හරිය යි කියලා බලා ගෙන හිටපු කාලේ ඉවර කරන්න කාලෙ හරි

රට අන්ත දුප්පත් තැනකට ගෙනාපු අය ගෙදර යවන්න කාලෙ හරි

මෙත්මා

2024

සැප්තැම්බර් 7

වත්තට ආ විහඟුන්ට

සිටියත් මල් පැණි බී
ආවොත් අද වරදි
ඈතට යන්න ගිලී
තුරු වදුලේ සැඟවී

කීචි  බීචී ගාලා
විහඟුන් හඬ නගලා
කුරුමානන් අල්ලා
පූසි එයි දුවලා

මෙත්මා
සැප්තැම්බර් 11, 2023

කවිය අහන්න

මා දුටු සැන්දෑවක්

පෙළින් පෙළට නිවහන් දිස් වේ මට දකුණින්
දොරින් දොරට වාහන නවතා ඇති නිතැතින්
පෙළින් පෙළට ගස් හදලා තියේ මට වමින්
උසින් උසට වැඩි ඒ ගස් පිරිලා කොළවලින්
ගසින් ගසට පියඹා යන කුරුල්ලෝ නිතැතින්
කියනේ මට සැන්දෑවක අසිරිය සතුටින්

කවිය අහන්න

ඔක්තෝබර් 2023
මෙත්මා

හවසක සිරි : නොනියා නොනියා

ලඟින් ඇවිල්ලා නිදාන ඉන්නා
නොනියා නොනියා නොනියා පුසි නොනියා \\
රූප බලන්නට අපි වාඩි වූ සඳ 
පොරව පොරව සීතලට රෙදි පොරවා ගෙන \\
විවේකයක් ගෙන සැඳෑ සුව විඳින්නට
කරල කරල කරලා වැඩ ඉවර කරලා \\
බිම වැටි රෙද්දේ කොනක ඈඳි ගෙන 
නොනියා නොනියා නොනියා පූසි නොනියා
ලඟ ඉන්නට ආසයි පූසි නොනියා
නොනියා නොනියා නොනියා කළු නොනියා
ඥාව් ඤව් ඤාව් ඤාව් ගාන්නා
නොනියානොනියා නොනියා සිල්ලී පූසා

පය හිරි වැටුනම මා නැගිටින සඳ
පැනල පැනල පැනලා පූසි පැනලා \\
හිරි අරිනවා අනේ නැට්ට උස්සගෙන
බලලා බලලා බලලා වටපිට බලලා \\
කෑම මතක් වී එය රහ බැලුමට
බළලා බළලා බළලා යනව කන්නට
නොනියා නොනියා නොනියා පුසි නොනියා 

නොනියා නොනියා සිල්ලි නොනියා 

ජූලී 29, 2024
මෙත්මා

කවිය අහන්නට

මඤ්ඤොක්කා හීලට

හතරට නැගිටලා ලොකු වතුර මුට්ටියක් උණු කරලා
මඤ්ඤොක්ක කපා උණු වතුර නටන හැලියට දමලා
හොඳින් තම්බලා ලුණු දාලා දිය පෙරා
පොල් කවලම් කරලා රැගෙන යනවා දන් නිසා

මෙත්මා
ජූලි 28, 2024

කවිය අහන්න

අපි අඳින ඇඳුම් කියන්නේ

අපි අඳින ඇඳුම් කියන්නෙ අපේ ජීවිතවල සරල බව පොරොන්දු 
අපි කන කෑම කියන්නෙ අපේ ජීවිත සුවපත් කරපු බොහෙත්
අපි කරන කථා බහ කියන්නෙ අපේ මුතුන් මිත්තන්ගේ සිරිත් විරිත්
අපේ ගති පැවතුම් ඇවැත් පැවැත් උනේ ඒ මුතුන් මිත්තන්ගේ ඇදහිලි විස්වාස

ජූලි 27, 2024
මෙත්මා

කවිය අහන්න

බඩගින්නේ මම

බඩගින්නේ මම ඇවිදන් යනවා
බර අඩු කෙරුමට කැලරි දහනයට
සීතල සුළඟක් ගත දැවටෙනවා
විසිතුරු ගස් මල් මට දිස් වෙනවා

මනසේ සුවයට ගතේ සැනසුමට
ඇවිදන් යනවා උදේ පාන්දර 
මේඝ වළා පාවෙයි හනි හනිකට
වැස්ස වැටේවිද මා යන්නට පෙර

මෙත්මා
ඔක්තෝබර් 5, 2023

කවිය අහන්න

බිංදු බිංදු පොද වැස්සක්

බිංදු බිංදු පොද වැස්සක් ඔන්න කඩා හැලෙනවා
ඩිංග ඩිංග වහල දිගේ වතුර ගලා ඇදෙනවා
හැඩට පිපුණු කහ මල් ටික හෙමින් හෙමින් හැලෙනවා
රතු ගිරවුන් දෙදෙනෙක් විත් කීචි බීචී ගයනවා

ඔක්තෝබර් 4, 2023
මෙත්මා 

කවිය අහන්න

සුළඟක් හමා යයි

සුළගක් හමා යයි මා ගත දැවටීලා
සීතල නෑ දැනුනේ සිසිලයි ගෙන එන්නේ
දළු දාමින් මේපල් ගස් පිබිදෙන්නට යනවා
මල් පිපෙන්න දවසක් දා පොහොට්ටු ලොකු වෙනවා

කවිය අහන්න

ඔක්තෝබර් 4, 2023
මෙත්මා

පිබිදෙන වසන්තය

දළු දාගෙන එන ගස් බල බල

පිබිදෙන විසිතුරු මල් දැක දැක

ලා අව් රැලි සිත් සේ විඳ විඳ

හිමිදිරියේ ඇවිදිමු පිය තිය තිය

ඔක්තෝබර් 11, 2023

මෙත්මා

වැස්සට කවි තුනක්

බිංදු බිංදු පොද වැටිලා මහ වැස්සක් එනවා
පාට පාට පුරවාගෙන දේදුන්නක් පායා
පාවි පාවි වළා ඇවිත් මුළු අහසම පිරිලා
පුංචි පුංචි මල් පිපිලා වැස්සේ හිනහෙන්නා

ඔක්තෝබර් 3 උදේ, 2023
මෙත්මා

සුලඟක් හමා යයි මා ගත දැවටීලා
සීතල නෑ දැනුනේ සිසිලයි මට දැනුනේ
දළු දාමින් මේපල් ගස් පිබිදෙන්නට යනවා
මල් පිපෙන්න දවසක් දා පොහොට්ටු ලොකු වෙනවා

ඔක්තෝබර් 4 උදේ

බිංදු බිංදු පොද වැස්සක් ඔන්න කඩා හැලෙනවා
ඩිංග ඩිංග වහල දිගේ වතුර ගලා ඇදනවා
හැඩට පිපුන කහ මල් ටික හෙමින් හෙමින් හැලෙනවා
රතු ගිරවුන් දෙදෙනෙක් විත් කීචි බීචි ගානවා

ඔක්තෝබර් 4 හවස

මෙත්මා

කවි අහමුද?

අපි ඉතින් වැඩිය ඇඟ මහන්සි කරලා වැඩ කරන අය නොවන නිසා දෛනිකව ව්‍යායාම කරන එක හරීම වැදගත්. ව්‍යායාම කරන එක  ශාරීරික සුවතාවයට වැදගත් බව නම් ඉතින් පේන්නම තියෙනවනේ. ඒ විතරක් නෙවෙයි ඒක මානසික සුවතාවයටත් ඉවහල් වෙනවා. ඒ නිසා මම දින පතා අනිවාර්යයෙන්ම උදේට ඇවිදින්න යනවා. වාර්ෂික නිඩාඩු දාලා ගෙදර ඉන්නැද්දි නම් ඒක මග ඇරෙනවා ටිකක්. ජොගින් නෙවෙයි, දුවනවත් නෙවෙයි ටිකක් වේගෙන් ඇවිදිනවා. උදේට විනාඩි විස්සක් වගේ ඇවිදිනවා වගේම කිලෝමීටර දෙකකට ආසන්න දුරක් යනවා. හැමදාම යන්නේ එකම පාත් එකක.

මොකක් හරි හේතුවක් හින්දා මට හිතුනා කවි ලියන්න. ලියන්න නෙවෙයි ගොතන්න. කවි හදන එක මට අළුත් දෙයක් නෙවෙයි. මට මතකයි මං හය වසරේ වගේ ඉන්න කාලේ කවි ලියන්න සෑහෙන උත්සහයක් ගත්තා. හරියට ලියාගන්නත් බෑ, ඒත් ලීවා. කොහොම හරි දිගටම කවි ලීවා. සෑහන කාලයක් නොයෙක් විදියේ කවි ලීවා, නමුත් පහු ගිය වසර දෙක තුනක දී වගේ නම් ඒක මග ඇරුනා. කොහොම හරි ඉතින් මට කවි ගොතන්න හිතුනනේ, මම ලියන්න පටන් ගත්තා. පූසි ගැන කවි කීපයක් ලීවා. 

උදේ ඇවිදිනකොටත් කවියක් ගොතන්න හිතුනා. ඉතින් මම හිතුවා, වැඩිය මහන්සි වෙන් නැතිව සරලව කවියක් ගොතන්න ඕනි කියලා, මේ ඇවිදින ගමන්. කවියෙ පදයක් ගොතලා තව එකක් ගොතන කොට අර කලින් පදේ අමතක වෙනවා, ඒ හින්දා මේක ගොතන ගමන්ම පෝන් එකේ හඬ පටි ගත කරා නම් හරි නේ කියලා, කවිය එක පාරටම ගොතන ගමන්ම පටි ගත කරා. මොන්න බොලේ කවි ගොතන කොට ගොතන කොට අදහස් එනවා නේද එක දිගටම. ඉතින් මුලින් මුලින් පද හතරක එක කවියක් ගෙතුවත්, පස්සෙ පස්සේ කවි පන්තිත් හැදුවා. ඒවා මේ හිටිවන කවි, එවෙලේ හදපුවානේ. ඒ ඒ දවවල පරිසරයේ ස්වබාවය ලියවිලා තියෙනවා මේ කවි වල. ඉතිං ඒ කවි කියවන්න කැමතිනම් ඒවා ලියන්න පුළුවන් මට. තාල එහෙමත් දාලා හැදුවේ. ඉතිං අහන්න කැමති නම් හඬ පටත් අමුණන්න පුළුවන්. මොකද කට්ටිය හිතන්නේ ඒ ගැන.

පූස් සහ බඹරු

පූසිනියා කොහෙද ගියේ

බඹරුන් අල්ලන්න ගියේ

ඒ බඹරුන් ඇයි ආවේ

මල් පැණි බොන්නයි ආවේ

යන්න එපා අල්ලන්නට

ඉන්න දෙන්න බඹරුන් හට

බඹරුන් වැඩියෙන් ආවම

සරු වෙනවනේ පළදාවම

ඔක්තෝබර් 2, 2023

මෙත්මා 

මිදෙන්න දොම්නසෙන් සැම

විඳින්න හමන සුළඟක සුව
අහන්න ගයන විහඟුන් ගේ හඩ
බලන්න පිපුණු මලක හැඩ
සිඹින්න විදිමින් ඒ මල් සුවඳ

හිඳින්න ගස් සෙවන යට
විඳින්න පළතුරු ගෙඩියක රස
සැනසෙන්න බලා ගිරවුන්ගේ හැඩ
හිනැහෙන්න දැක උන්නේ වැඩ

ඇවිදින්න මං මාවත් දිග
හිනැහෙන්න අයෙක් හමු වූ විට
බලන්න අවට සුන්දරත්වය
විඳින්න හැම මොහොතකම සුව

සැනසෙන්න බලා නුබ
හිතන්න වහී විද කියා අද
බලන්න හිරු බසින රඟ
තුටු වෙන්න දැක දම් වළා පෙළ

මෙත්මා 
ජනවාරි 11, 2024